ක්‍රි.ව 1890 ජනවාරි මස කොළඹ වැල්ලවත්තේදී ඩබ්ලිව් ඒ සිල්වා මහතා උපත ලැබීය. වැල්ලවත්ත ආරච්චිගේ හරමානිස් සිල්වා මහතා ඔහුගේ පියා වූ අතර බෝමිරියේ කර්ලැයින් ගෝමිස් මහත්මිය මව වූවාය.
ඩබ්ලිව්. ඒ සිල්වා මහතාගේ ප්‍රථම " "සිරියලතා" නමින් 1909 වර්ෂයේදී පළ විය.එම කෘතිය පළ කරන විට සිල්වා මහතා 17 වැනි වියෙහි පසු විය. මීලගට ඔහු අතින් නිර්මාණය වූයේ " ලක්ෂ්මී හෙවත් නොනැසෙන රැජිණිය" යන නව කතාවයි. මොහුගේ නව කතා ආයාසයකින් තොරව ඉතා සැහැල්ලුවෙන් කියවීමට හැකි ඒවාය. මේ හේතුව නිසාම එකල පාඨක ජනතාව මොහුගේ කෘති කියවීමට මහත් අභිරුචියක් දැක්වූහ.
මුල් නවකතා කරුවන්ගේ නවකතා වල මෙන් ජාතික හැඟීම ආගමික හැඟීම් ඇතුළත් නොකළ ඔහු පාඨකයාගේ රසාස්වාදය සඳහා කතා ප්‍රවෘත්තිය පමණක් ලිව්වේය. මේ නිසා සැහැල්ලුවෙන් නවකතාවක් කියවා අවසන් කිරීමට හැකි වීමෙන් පාඨකයාගේ කියවීමේ උනන්දුවද වැඩි දියුණු විය. මෙම කතා තුළට ප්‍රේමය, ත්‍රාසය හා අද්භූත සිද්ධීන් ඇතුළත් වී තිබූ නිසා පාඨකයා තව තවත් ඒ කෙරෙහි ආකර්ෂණීය විය. මොහුගේ කතා වල ද සුදනන් හා දුදනන් වශයෙන් සුදු කලු චරිත පැහැදිලි ලෙස වෙන් කර තිබේ. දුෂ්ටයා පරාජය කොට ධර්මිෂ්ටයා ජය ගැනීමත් දුෂ්ටයාට නිසි දඩුවම් ලබා දීමත් මොහුගේ රටාව විය. මීට අමතරව ගැඹුරු ජීවිත විවරණයක් මෙහි දක්නට නොලැබේ.
ඩබ්ලිව්. ඒ සිල්වා මහතාගේ ජනප්‍රියම නව කතාව වූයේ "හිඟන කොල්ලා" යි. මෙය අතිශයින් ජනප්‍රිය වූයේ රහස් ක්‍රම, රහස් ලියුම්, වෙඩි තැබීම්, කාන්තාවන් පැහැරගෙන යෑම් ආදිය අන්තර්ගත වී තිබූ නිසාය.
1933 දී පළ වූ " කැළෑ හඳ" නවකතාවද හිඟන කොල්ලා තරම්ම පාඨකයන් අතර ජනප්‍රිය විය. "සුනෙත්‍රා හෙවත් අවිචාර සමය" , " විජයබා කොල්ලය" , " රදල පිලිරුව" නවකතා තුළින්,අතීතය පිළිබඳ හැඟීමක් පාඨකයා තුළ දැනවීමට ඩබ්ලිව්. ඒ සිලවා මහතා උත්සාහ කර තිබේ. මොහු " ලේන්සුව" , "සක්විති රජ" , "අමෘත හස්තය" හා " දළ කුමාරි" යන කෙටි කතාද නිර්මාණය කර තිබේ.
සිංහල සාහිත්‍යය පෝෂණය කිරීමෙහිලා මහඟු සේවයක් ඉටු කළ ඩබ්ලිව්. ඒ සිල්වා 1957 මැයි මස පරලෝ සැපත් විය.
2 comments:
Very helpful
Thank you
I found lots of information
Post a Comment